गुड फ्राइडे सिनेमा
मलयालम (दक्षिण भारतीय) सिनेमाको विशेषता नै हो — सामान्य मानिसका कथा र स्थानीय परिवेशलाई जीवन्त ढंगले पर्दामा उतार्नु।
सन् २०१७ मा आएको 'अंगमाली डायरिज' यसको एउटा उदाहरण हो। ८६ जना नयाँ कलाकार, केरलको एउटा सहरको कथा र ११ मिनेट लामो एकै सटको क्लाइमेक्सले यो फिल्मलाई विशेष बनाएको छ।
यो फिल्मले केरलको अंगमाली सहर, त्यहाँको स्थानीय संस्कृति, युवाको महत्त्वाकांक्षा, ग्याङ फाइट र बदलाको कथालाई यस्तो शैलीमा प्रस्तुत गर्छ, जसले दर्शकलाई सुरूदेखि अन्त्यसम्म बाँधिराख्छ।
कथा भिन्सेन्ट पेपे र उसका साथीहरूको वरिपरि घुम्छ। बाल्यकालदेखि समूह बनाएर हिँड्ने उनीहरू हुर्किंदै जाँदा स्थानीय ग्याङ संस्कृतिको हिस्सा बन्छन्।
सानातिना झगडा, प्रेम, आपसी मित्रता र आफ्नो क्षेत्रमा प्रभाव जमाउने चाहनाबाट सुरू भएको उनीहरूको यात्रा बिस्तारै अपराध र हिंसाको संसारतिर मोडिन्छ।
पेपे साथीहरूसँग मिलेर व्यवसाय गर्ने सपना देख्छन्। तर प्रतिद्वन्द्वी समूहसँगको सम्बन्ध, पुरानो रिसइबी र एउटा हिंसात्मक घटनाले उनको जीवन जटिल बनाउँछ।
व्यवसाय, पैसा, प्रेम र बदलाको चक्रमा फसेका पेपेले आफ्ना निर्णयको मूल्य चुकाउनुपर्छ।
फिल्मले अपराधलाई 'ग्ल्यामराइज' गरेर मात्र प्रस्तुत गर्दैन। अपराधमा संलग्न युवाको सामाजिक परिवेश, उनीहरूको महत्त्वाकांक्षा र स्थानीय शक्ति संघर्षलाई पनि देखाउँछ।
फिल्मको नाममै रहेको अंगमाली कथाको महत्त्वपूर्ण हिस्सा हो। स्थानीय भाषा, खानपान, चाडपर्व, सडक र मानिसहरूको दैनिक जीवनलाई फिल्ममा कथासँग स्वाभाविक रूपमा जोडिएको छ।
ग्याङस्टर फिल्मको कथावस्तु नयाँ होइन। तर अंगमाली डायरिजको विशेषता कथा सुनाउने तरिकामा छ। ठूला कलाकारबिना पनि बलियो निर्देशन र मौलिक प्रस्तुतिले दर्शकलाई प्रभावित पार्न सकिन्छ भन्ने यसले देखाउँछ।
अंगमाली डायरिजमा ८६ जना नयाँ कलाकारले अभिनय गरेका छन्।
यसको सबभन्दा ठूलो आकर्षण र चर्चाको विषय भने ११ मिनेटको क्लाइमेक्स हो। यो एकै सटमा खिचिएको छ, जसमा करिब एक हजार कलाकार सहभागी छन्। भीडको व्यवस्थापन, क्यामराको निरन्तर गति र एउटै प्रवाहमा समेटिएको दृश्य फिल्मको सबभन्दा बलियो र चर्चित पक्ष हो।
अंगमाली डायरिजले समीक्षकबाट सकारात्मक प्रतिक्रिया पाएको थियो। खासगरी यथार्थपरक प्रस्तुति, छायांकन, कलाकारको अभिनय र एक्सन दृश्यको खुब प्रशंसा भयो। फिल्मले कमाइ पनि राम्रो गरेर सुपरहिटमा दर्ज भयो।
'द हिन्दू' ले यसलाई दशककै उत्कृष्ट २५ मलयालम फिल्मको सूचीमा समावेश गरेको थियो। यसले विभिन्न विधामा ८ वटा अवार्ड जितेको छ।
हेर्नुस् हिन्दीमा अंगमाली डायरिज
